CEBU, Philippines - Lain na usab nga mga archaeological finding nga may labot sa lubnganan sa karaang mga tawo sa lungsod sa San Remegio ang nakawtan sa hiniusang team sa National Museum, University of San Carlos ug Probinsya sa Sugbo.
Ang maong archaeological excavation gipahigayon sa lapyahan sa San Remegio Public Beach nga gipangulohan nila ni Philippine National Museum (PNM) archeologist Ame Garong ug Capitol Consultant on Heritage and Museum Affairs, Jojo Bersales.
Matud pa ni Bersales nga mapuslanon kaayo kining tanan alang sa lungsod sa San Remegio kay makahatag kini og dugang pagtulon-an sa mga molupyo bahin sa kasaysayan sa unang mga tawo nga namuyo sa maong lugar.
Busa, usa ka archaelogical park ug site museum ang ilang gisugyot nga itukod sa maong lungsod diin ang karaang mga kasangkapan sa kusina, sama sa plato, banga, ug nagkalainlaing kasangkapan sa balay nga nakawtan maoy ibutang sa sulod sa museum.
Sa laing bahin si Ruth Hermoso, Tourism Officer sa maong lungsod mapasigarbuhon kaayo sa maong findings.
Dako usab ang iyang pasalamat kang Governor Gwendolyn Garcia sa walay puas niining suporta nga nakadugang sa kahibalo sa mga residente labina sa mga kabatan-onan mahitungod sa kultura ug kagikan sa lungsod. (BANATNEWS)