Magsul-ob og police uniform dakpon

CEBU, Philippines - Gihagit ni Mayor Michael Rama ang kapolisan sa pagdakop sa mga sibilyan   nga mosul-ob og uniporme sa polis ug militar.

Matud pa sa mayor nga angayang tahuron ang uniporme sa mga awtoridad ug dili maayo nga yano-yanuhon lang sa mga tawo ang pagsul-ob niini .

Giisip sa mayor nga sagrado ang maong uniporme alang sa mga otoridad nga gipasul-ob niini ug ang pag-uran-oran og sul-ob niini sa tawong sibilyan o dili otoridad, usa ka tataw kaayong pagbugal-bugal ug gipabarato nila ang maong uniporme.

Gipasabot sa mayor nga ang maong uniporme gitahud sa katilingban ug una makasul-ob ang usa ka polis ug sundawo niini nag-agi og daghan kaayong pagsulay dili lamang sa ilang edukasyon ug sa pangutok, kundi bisan sa physical nilang abilidad ug kapasidad.

Apan kun ang maong uniporme isul-ob nalang sa mga drayber sa traysikad ug mga basurero, unsa pa may gibug-aton ning maong talahuron nga uniporme? Pangutana sa mayor.

Busa gusto ni Rama nga sa makausa pa mahunong na ang maong matang pag-abuso sa mga sibilyan sa paggamit sa maong uniporme.

Kini pinaagi sa pagpakita sa kapolisan nga may gahum sila sa pagpatuman sa balaod kay dugay na ang balaod nga nagdili sa publiko sa paggamit sa mga uniporme sa polis ug sundawo ug ang molapas niini silotan. Gawas usab niini gusto sa mayor nga bisan kadtong mga tindahan sa ukay-ukay nga maoy tinubdan niining mga unipormeha kahatagan og pasidaan nga dili maayo nga bisan kinsa lang tawhana ang ilang baligyaan niini.

Nasayran nga ang maong uniporme isul-ob sa mga sibilyan aron ikapanghambog nila nga sakop sila sa polis o kaha sundawo sa goberno aron makahigayon sila sa pagpangabuso sa ilang isigkatawo. 

Iyang gipasidan-an ang mga tindahan nga kun mobaligya sila niini sigurohon nila nga lehitimong polis ug sundawo ang ilang baligyaan niini.  - BANAT NEWS