SRP giandam alang kang Calungsod

MANILA, Philippines -  Ang kagamhanan sa Siyudad sa Sugbo magsugod na sa paglimpyo sa usa ka  bahin sa South Road Properties (SRP) diin ipahigayon ang thanksgiving activity sa kanonisasyon ni Beato Pedro sa hingpit nang pagka-santos niini karong Oktubre.

Sayo niini si Mayor Michael Rama mipahibawo nga ipagamit niya ang 25 ka ektarya nga luna sa SRP alang sa nahisgutang kalihukan.

Ang mayor mihimo na og site inspection sa maong area sa miaging adlaw ug iyang girekomendar nga butangan gyud kini og igong parking area kay gituohan nga motambong usab sa nahisgutang kalihukan ang mga debotos ni Calungsod gikan sa laing lugar.

Dugang pa sa mayor nga gipatigbabaw niya ang lapad nga kooperasyon aron tulin ug hapsay ang pagpadagan sa nahisgutang selebrasyon.

Nasayran nga dili pa matino sa mayor kung makahatag ba ang siyudad og salapi basta gisiguro niya nga makahatag ang city hall og mga gamit nga gikinahanglan sama sa entablado, tolda ug uban pa.

Matud pa sa mayor nga dako kaayong garbo sa mga Filipino si Calungsod busa angayan kining hatagan og dakong selebrasyon hinungdan nga nagtinabangay karon ang siyudad ug Simbahan alang sa kalamposan niini.

Dugang pa ni Rama nga bisan nga managlahi ang goberno ug Simbahan, dili kalikayan nga adunay pipila ka programa nga kini maghiusa sanglit nailhan naman ang mga Sugboanon nga mga relihiyosong tawo ug mahimo usab kini nga parte sa kasaysayan sa Sugbo.

Napanagnaan ni Rama nga magbaha ang linibo ka tawo nga motambong sa maong kalihukan busa gipaalerto niya ang kapolisan, bisan ang mga tinugyanan sa kasanihan uban ang mga ambulansya aron sa pagbantay kun adunay kagubot o kaha may maglain ang lawas maatiman dayon.

Ang mga manambong giawhag usab sa mayor nga magbantay sa ilang kaugalingon basin may mga dautang elemento nga makasum-ok sa bagang duot sa katawhan ug   manguot, manglabni o kaha manulis. (BANATNEWS)