Mactan Airport di angay balhinon

CEBU, Philippines - Suportado sa mga magpapatigayon ug sa Tourist Organization sa Sugbo ang plano nga pagpalambo sa Mactan Cebu International Airport (MCIA) inay nga balhinon ngadto sa Cordova aron kini makaatiman sa minilyon pang mga pasahero sa mga abyon.

Gibutyag ni Presidente Emeritus Edilberto Emphases sa Mandaue Chamber of Commerce and Industry (MCCI) nga panahon na karon nga   palambuon ang MCIA aron labi kining makasilbi sa daghang mga pasahero sa mga eroplano nga motugpa sa maong tugpahanan

Matud pa ni Emphases nga di na kinahanglang ibalhin pa ang maong tugpahanan kay   magdugang kini og gasto nga labing makahibus sa panudlanan sa kagamhanan.

Misantop sa hunahuna ni Emphases ang maong plano karong giisip na ang Sugbo nga maoy nag-unang suroyanan sa mga turistang lokal ug langyaw.

Samtang si Jim Feliciano,   ang director sa planning sa Department of Transportation and Communication (DOTC) una nang mipadayag nga ang Mactan airport palambuon ubos sa Public-Private Partnership Scheme nga gahinan og P 5.8 bilyones .

Kun mahinayon ang maong proyekto ang Mactan airport nga sa pagkakaron gibana-banang makadawat lang og 4.5 milyones nga pasahero matag tuig, mahimo na unya kining makadawat og 10 milyones ka mga pasahero sa matag tuig.

Unya ang terminal sa pagkakaron nga maoy dangpanan sa mga pasaherong pang-domestic ug international, gamiton nalang gyud alang sa mga pasaherong lokal, samtang magtukod og terminal nga alang gayud sa mga international nga pasahero.

Niadtong Hulyo sa miaging tuig ang Korea International Cooperation agency maoy miduso og kompletong feasibility study sa bag-ong gisugyot nga passenger terminal building ngadto sa National Economic Development Authority (NEDA) board alang sa paglig-on niini.

Samtang gibutyag ni Emphases nga dako siyang uyon nga ipaayo ang Mactan airport kaysa ibalhin kini.

Usa sa nag-unang hinungdan nganong dili angayang ibalhin ang maong tugpahanan tungod kay alang kang Emphases usa kini ka suntok-buwan, ug nagkina-hanglan na usab kini og laing reclaimed area nga makapasamot sa dakong gasto.

Dugang ni Emphases nga ang Mactan airport sa pagkakaron naandan na sa publiko busa angay kining magpabilin sa maong dapit.

Samtang pabor usab ang usa sa board of director sa Filipino-Cebuano business club nga si Silvano Marangga sa pagpalambo sa Mactan airport ilabina kun aduna nay gitagana nga pundo niini aron mas mapalig-on pa ang ekonomiya ug turismo sa Sugbo.  - BANAT NEWS