CEBU, Philippines - Talandugon ang kahimtang sa usa ka 27 anyos nga ginang human mapaksit ang walang bahin sa ulo niini dihang gitigbas sa iyang ig-agaw tungod sa lalis pag-ilogay sa hayhayan sa sitio Camburong, barangay Poblacion lungsod sa Oslob niadtong Martes sa alas 5:50 sa hapon.
Ang biktima mao si Elma Serenio Hangalay, 27, nagpuyo sa maong lugar samtang ang suspek mao ang iyang ig-agaw nga si Jurry Serenio Luna, 33, nga usa ka mag-uuma.
Matud ni SPO1 Job Sarveda sa Oslob Police dihang nahinabi sa Banat News, ang biktima ug ang asawa sa suspek maoy unang nagkalalis tungod kay dili mosugot ang biktima nga manghayhay kini sa iyang hayhayan sa ilang tugkaran.
Samtang sila nagkatinubagay miabot ang suspek nga gikan sa umahan ug maoy nipalit sa lalis hangtud nga nagkainitay ug nabanhaw ang ilang karaang panagbingkil.
Ang suspek nga wala makapugong sa pagsige og tagawtaw sa biktima mikuha kini og sundang ug gihapsan ang biktima sa walang bahin sa ulo ug napaksit kini.
Daling gihatud sa Oslob District Hospital ang biktima ug gilahos sa tambalanan dinhi sa dakbayan sa Sugbo tungod sa kapeligro sa kahimtang niini.
Ang suspek nadakpan usab sa mirespondeng mga polis ug gikatakdang pasakaan og kaso. (Darrel A. Carumba/EIM) (BANAT)