Bikini Bar gironda 17 babaye giluwas

CEBU, Philippines - Giluwas ang 17 ka mga babaye gikan sa usa ka bikini bar diha sa dalan Sanciangko sa barangay Kalubihan ning dakbayan atol sa gihimong operasyon sa miaging gabii sa mga sakop sa Regional Human Trafficking Task Force (RHTTF) inabagan sa mga sakop sa Department of Social Welfare and Development (DSWD)-7 ug International Justice Mission (IJM).

Sa 17 ka mga babaye, duha kanila ang kompirmadong menor de edad samtang laing usa pa ang gidudahang mienor de edad pa ug kasamtangan karun silang gipahiluna sa buhatan sa DSWD.

Atol sa maong operasyon nadakpan sa entrapment operation ang giingong ‘bugaw’ ug manager sa maong bikini bar nga giilang si Ronilo Camaling,50.

Ang ronda gipangulohan ni Sr. Insp. Macatangay sa Police Regional Office-7.

Si Edna Regudo Social Welfare 2 Crisis Intervention Unit sa DSWD-7 nga nahinabi sa Banat News nagkanayon ilang gikunsiderar nga mga biktima ang 17 ka mga babayeng naluwas sa maong operasyon.

Matud ni Regudo nga sa ilang pakighinabi kagahapon sa buntag, usa pa ka babaye ang kompirmadong menor de edad nga nagpangidaron og 16-anyos nga taga dakbayan sa Sugbu.

Hinuon dili pa makasulti si Regudo kun ang tanang 17 ka babaye nadakpan naba kaniadto sa ubang mga bikini bars dinhi sa dakbayan nga mibalik sa mao gihapong trabaho.

Matud ni Regudo mitug-an ang mga babaye nga napugos sila pagsulod sa maong matang sa trabaho tungod kay mubo ra sila og kinaadman hinungdan nga maglisod sila sa pagpangita og maayong trabaho nga dunay hustong sohulan.

Sa 17 ka mga babaye, adunay taga probinsya sa Sugbu ug ang uban sa dakbayan sa Sugbu matud pang Regudo.

Base sa iyang interbyu sa 16-anyos kini miangkong ganahan ra gyud kini sa maong matang sa trabaho nga sa sinugdanan nanguryoso ra kini kun unsay trabaho sa usa ka bikini bar.  (BANATNEWS)