Nanglugos og 18-anyos priso

CEBU, Philippines - Nantingkagol sa Talisay City detention cell ang usa ka 54-anyos nga lalaki human kini pasanginling nanglugos og 18-anyos didto sa barangay Cansojong, dakbayan sa Talisay kagahapon sa kaadlawon. Ang suspetsado mao si Eliseo Timoteo, minyo, apan taud-taud nang gibiyaan sa asawa, residente sa maong dapit kinsa nakaangkon og mga bun-og sa lawas human kini tabangi og kulata sa mga estambay nga nakasakop sa iyang gibuhat.

Si Inspector Margienette Yosores sa Talisay City Police Station Women and Children Protection Desk (WCPD) sa pakighinabi sa Banat News kagahapon mibutyag nga ang maong pagpanglugos unang nahitabo niadto pang buwan sa Enero sa milabay’ng tuig ug nasundan pa kini sa pipila ka higayon apan ang biktima wala mosumbong ngadto sa iyang mga ginikanan tungod kay giingong nahadlok kini sa bahad sa suspetsado nga apilon og priso sa polis ang iyang inahan kung motug-an sa iyang (suspetsado) gibuhat.

Matud ni Yosores nga sa wala pa mahitabo ang ulahing insidente ang biktima uban sa iyang mga ig-agaw nga namista sa barangay Lagtang, Talisay ug nauli nianang mga alas 2:00 na sa kadlawon kagahapon.

Dihang naabot na sa ilang balay ang biktima mibalik og gawas aron mangihi apan giingong giatangan kini sa suspetsado ug gidala ngadto sa usa ka bakanteng balay ug didto giamong-amongan na usab. Ang mga estambay nga nakabantay nga gidala sa suspetsado ang biktima milili kini sa gibuhat sa suspetsado sulod sa balay nga gidad-an niya sa biktima. Dihang nasuta nila ang pagpahimus sa suspetsado sa dalagita ila kining gitabangan og bunlot ug gikulata.

Usa sa mga residente sa lugar maoy daling mi-report sa kapolisan tungod sa nahitabong kagubot sa maong lugar.

Ang kapolisan daling miresponde sa maong report ug nasikop si Timoteo kinsa ila unang gipatambalan sa Talisay City District Hospital tungod sa mga bun-og niini sa lawas una ibalhog sa karsel.  - BANAT NEWS