Bata giugbok giyatak-yatakan sa 'buang'

CEBU, Philippines - Usa ka bata ang nalandig sa tambalanan human kini kalit lang nga gialsa ug giugbok sa usa ka lalaki nga gituohang adunay deperensya sa pangisip sa miaging gabii pasado alas- 9 sa Natalio Bacalso barangay Sambag 1 ning dakbayan.

Ang lalaki nga gituohang adunay sakit sa pangisip mao si Geoffrey Briones, 43, molupyo sa lungsod sa Minglanilla.

Sa pakighinabi sa Banat News ni SPO4 Mario Revilla mibutyag nga hangtod ning pagpatik sa balita nagpaabot pa sila sa tagtungod sa bata aron mohatag og impormasyon kabahin sa nahitabo.

Apan base sa ilang nakuhang impormasyon naagian lang ni Briones ang bata ug kalit niya kining gibunlot ug giugbok sa sementadong dalan.

Pagkahuman niini giingong giyataktakan kini sa suspek ug wala na maglihok dihang gilung-an. Tungod sa kapungot sa mga tawo gikuninitan og kulata si Briones hinungdan sa mga bun-og niini.

Ang bata daling gidala sa Cebu City Medical Center (CCMC) samtang gihatud sa mga tanod sa Fuente Police Station ang suspek. Gipaabot pa kung mopasaka og kaso ang tagtungod sa bata. (BANATNEWS)