CEBU, Philippines - Gitakda karong Disyembre 11 niining tuiga ang tibuok adlaw nga kalihokan sa mga miyembro sa urban poor organization sa dakbayan sa Mandaue isip pagsaulog sa Solidarity Week niini.
Nunot sa maong kasaulogan gihan-ay na karon ang mga nagkadaiyang programa sa maong adlaw nga pasiugdahan sa Housing on Urban Development Office (HUDO) ug sa Mandaue City Board on Socialized Housing (Macbosh) sa maong dakbayan.
Si Cynthia Suico nga maoy community affairs officer sa HUDO mibutyag sa mga tigbalita nga sa maong adlaw ipahigayon ang nagkadaiyang indigay kon contest, ingon man ang pagpananom og mga lubangon sa mga kahoy isip tampo sa mga miyembro sa urban poor sa pagpahiuli sa kalikopan.
Apan matud pa ni Suico nga ang labing mahinungdanon nga bahin sa ika-23 ka tuig nga Solidarity Week celebration mao ang pagsubo sa mga model houses sa barangay Paknaan sa maong dakbayan ug ang pagtugyan niini ngadto sa mga benepisyaryo.
Matud pa ni Suico nga ang 6.5 ka ektaryang luna sa barangay Paknaan nga gitagana sa kagamhanan isip relocation site sa mga sakop sa urban poor, gilimpiyohan na karon. - BANAT NEWS