53-anyos gidakdaka'g case sa beer patay

CEBU, Philippines - Usa ka 53-anyos nga lalaki ang giunay pagpatay sa iyang kaugalingong ig-agaw tungatunga sa ilang panag-inom og bino diha sa barangay Lingigon sa bukirang bahin sa lungsod sa Argao niadtong Domingo sa alas 5:00 sa hapon.

 Ang biktima mao si Guillermo Albios, 53, molupyo sa maong lugar samtang ang suspek mao ang iyang ig-agaw nga si Miguel Albios, 47, molupyo ra usab sa maong dapit.

Matud ni PO2 Bernie Lao, sa Argao Police Station dihang nahinabi sa Banat News nag-inom ang duha uban sa usa ka Alejandro Gomez sa waitingshed sa maong lugar.

Apan tungod sa kahubog diha na matulog ang biktima sa sementadong lingkuranan sa waiting shed ug gibiyaan sa suspek ug ni Gomez apan giingong gibalikan kini sa suspek ug gikabay-an ang dughan sa biktima ug gidakdakan sa makadaghan sa case sa beer ang ulo niini.

Ang suspek nadakpan sab dayun sa mga tanod human dunay nakasumbong sa gibuhat niini sa biktima. Ang biktima gituohang nakaangkon og grabeng kadaot sa ulo tungod sa maong pagdakdak sa case sa beer ug laing gituohang gahi nga butang   nga nakaingon kamatayon niini.

 Ang suspek mitug-an sa pagsukit sukit sa kapulisan nga naglagot siya sa biktima tungod kay matag mahubog kini kanunay nga pang-ibton ang tanan niyang mga tanom nga utanon ug di gyud mopatuo bisan iyahang badlungon. (BANATNEWS)

Show comments