CEBU, Philippines - Gitinguha sa kagamhanan sa dakbayan sa Mandaue nga palapdan ang dalan A.S. Fortuna ug dalan Albano sa barangay Maguikay aron masolusyonan daan ang gipaabot nga pagbug-at sa dagan sa trapiko sa maong dapit nunot sa umaabot nga pagbukas sa duha ka dagkong malls sa maong mga dalan.
Si Mandaue City Planning Officer Engineer Florentino Nimor miingon nga kung mangabli na ang J. Mall sa dalan A.S. Fortuna ug SM Hypermart sa dalan Albano sa barangay Maguikay hayan mobug-at usab ang dagan sa trapiko sa maong lugar.
Ang dalan Albano maoy lutsanan paingon sa dalan A.S. Fortuna ug ingon man dalan M.L. Quezon sa barangay Maguikay sa maong dakbayan apan ang kasamtangang two-lane road niini maghuot na gyud sa umaabot nga mga adlaw.
Plano sa dakbayan nga madugangan kini og duha pa ka lanes aron mahimong four -lane road ang nahisgutang mga dalan. Sa pagkakaron nagpadayon na ang ilang pagpangandam sa plano lakip na sa work estimates.
Sa nasayran nga nakigtagbo si Mayor Jonas Cortes sa mga molupyo sa maong mga dapit nga maapektahan sa road widening ug gipasabot sa kama-hinungdanon niini.
Hinuon ang maigo sa road widening bayran sa siyudad sa kasamtangang fair market value niini. (BANATNEWS)