Nurse, P1.8m nubain sikop

CEBU, Philippines - Mikabat sa P1.8 milyones ang balor sa mga ampule sa Nubain nga nasakmit sa mga   tinugyanan sa Provincial Intelligence Detection Management Branch (PIDMB) sa usa ka buy bust operation nga ilang gilusad didto sa parking lot sa Gaisano Mall sa barangay Tabunok, dakbayan sa Talisay diin usa ka nurse ang ilang nasikop kagahapon pasado alas 7:00 sa buntag.

Ang nasikop nailhan nga si Leonarda Mauyag Lim, 51, nga taga Lower Pakigne, lungsod sa Minglanilla kinsa nailhang usa ka nurse.

Sa pakighinabi sa Banat News kang Sr. Supt. Henry Binas, hepe sa PIDMB, nasayran nga ang ilang buhatan nakadawat   og kasayoran kalabot sa pagpamaligya ni Lim og Nubain sa ilang lungsod.

Hinungdan nga sulod sa duha ka semana gipaubos nila kini sa usa ka surveillance   hangtod nga nasuta nila nga positibo ang nadawat nilang impormasyon.

Dihadiha, ang sakop ni Biñas nga silang PO3 Cesar Pandong, PO2 Roy Carlo Veloso, PO2 Fredrick Ybañez, PO2 Albert Luardo ug PO1 Esmeraldo Quillosa mipahigayon dayon kagahapon ug buybust operation.

Ang poseur buyer sa kapolisan ug si Lim nagkasabot nga paliton sa nahauna ang 2,000 ka ampules nga Nubain sa kantidad nga P100 mil.

Sa diha nga gitunol na ni Lim ang gituohang Nubain kalit dayong mipaila ang kapolisan nga mga otoridad sila sa balaod ug giposasan dayon si Lim.

Matud pa ni Biñas nga gawas sa gitunol ni Lim nga mga ampules sa Nubain ngadto sa ilang poseur buyer, nasakmit pa gyud nila ang laing duha ka karton nga gisudlan sa 6,000 pa ka ampules nga Nubain .

Mipasabot si Biñas nga ang kantidad sa usa ka ampule P300 sa street value, ug dihang gikuwenta nila ang tanang ampules sa Nubain nga ilang nasakmit gikan kang Lim mikabat sa P1.8 milyones ang tanan.

Matud pa ni Biñas nga basi sa kasayorang nahipos nila si Lim usa ka nurse ug ila pang gikonpirmar sa pagkakaron.

Kasong kalapasan sa Sec. 5 ug Sec. 11 sa Art. 2 sa Republic Act 9165 o pagpamaligya ug paghupot og ginadiling drugas maoy ipasaka sa mga otoridad batok ni Lim. Kasamtangang gitanggong si Lim sa karsel sa Talisay City Police office samtang gihikay pa ang             kaso nga isang-at batok kaniya. (WC) (BANATNEWS)