Tulo nabiktima sa tulis

CEBU, Philippines - Tulo ka tawo ang nabiktima sa tulis sa dakbayan sa Sugbo ug Mandaue kagahapon sa udto.

Ang mga biktima mao sila si Grace Go, 46, Josefina Jejam, 51, nga pulos taga Banawa Hills, barangay Guadalupe, dakbayan sa Sugbo ug Marilyn de Guzman Sayson, 28, nga taga Banilad, dakbayan sa Mandaue.

Sila Go ug Jejam nagsakay og PUJ paingon sa Guadalupe gikan sa Cebu Business Park, dihang pag-abot nila sa Forest Hills, kalit silang gitionan og kutsilyo sa duha ka wala hiilhing kauban nilang pasahero usab uban sa pagdeklarar nga tulis.

Samtang si Sayson mao pay pagkanaog sa iyang awto dihang gisugat siya sa duha ka tawo nga nagsakay og motorsiklo kinsa mition kaniya og armas de fuego uban sa pagpahibawo nga tulis, atubangan sa ilang balay sa AS Fortuna street, Banilad.

Si Go ug Jejam, nakuhaan og mga cell phone, samtang si Sayson nakuhaan og cash nga P6,000 ug $100 ug mga cell phone.

Ang mga biktima pulos nagtibi nga isumbong   sa kapolisan sa ilang gidangatan ug milihok dayon ang mga otoridad   sa pagpangita sa mga tulisan. - Romeo T. Limpangog ug mga PIT Intern Monna Mae Romero ug Nica Vencelao/WC (BANAT NEWS)