CEBU, Philippines - Namatay na ang nailang tigpamaba sa New People’s Army nga si Gregorio “Ka Roger” Rosal tulo ka buwan human kini atakeha sa sakit sa kasingkasing.
Ang public information officer sa NPA nga si Marco Balbuena nagkanayon nga si Rosal namatay niadtong Hunyo 22 tungod sa atake sa sakit sa kasing-kasing sa edad nga 64.
Si Rosal maoy pangulo sa NPA Melito Glor Command sa Southern Tagalog sulod sa pipila ka katuigan ug natudlong nasudnong tigpamaba sa Communist Party of the Philippines hangtud na sa iyang kamatayon.
Sumala pa sa report sa ABS-CBN News.Com. wa mohatag og dugang detalye ang mga lider sa komunistang pundok kabahin kang Rosal tungod sa gihulagway nilang “intense military operations.”
Si Rosal kaniadto pa kanunay nga naa sa telebisyon aron paghatag og pamahayag kabahin sa ilang mga kalihukan apan gidungog kining namatay sukad pa sa milabay’ng tuig tungod kay wala kini motambong sa peacetalks.
Gimando na sa Malacañang nga kompirmahon ang maong report. - Gikan sa Wires/EIM (BANAT NEWS)