Hubog milayat sa pantalan mitidlom

CEBU, Philippines - Usa ka hubog ang wala pa makit-i sa oras ning pagsuwat sa balita human kini giingong milayat kagahapon sa kaadlawon diha sa pantalan sa barangay Poblacion, lungsod sa Argao.

Ang milayat mao si Dondon Saniel, residente sa sitio Media sa nahisgutang barangay.

Si PO2 Bernie Lao sa Argao Police Station sa pakighinabi niini sa Banat News kagahapon nagkanayon nga ang nahisgutang pantalan kanhi dunggoanan og barko apan wala na padunggoi tungod kay mabaw na ang giladmon niini.

Matud ni Lao nga si Saniel hubog kaayong milakaw paingon ngadto sa tumoy sa pantalan ug gituohang kalit milayat. Nagtuo ang mga polis nga buot lang maligo ni Saniel apan tungod sa kahubog ug sulog dagat mitidlom kini ug gianod.

 Ang tsinelas ni Saniel nahibilin pa diha ibabaw sa pantalan. Dugang pa ni Lao nga ang mga residente sa maong dapit mibutyag nga kinaiya na ni Saniel nga magbahas-bahas sa dalan kun mahubog apan dili mangita og samok.

Sila si PO2 Marvin Chin ug PO1 Brian Yosores ang nagpahigayon og search and rescue operation apan wala gyud nila mapalgi si Saniel. (BANAT NEWS)