Tulo ka tulisan nasikop

CEBU, Philippines - Gumikan sa hot pursuit operation sa kapolisan sa Mandaue City Police Office (MCPO) wala molanat og 24 oras nasikop dayon ang 3 ka mga tawo nga mitulis sa usa ka 17 anyos nga babaye didto sa Plaridel st. sa barangay Cambaro, dakbayan sa Mandaue sa milabay’ng hapon.

Ang nasikop mao sila si Beauregard Cabreros, 25, Jessie June Palad, 23, ug Virgilio Mandaue, 28, ulitawo, pulos mga residente sa Sitio Kapusoan, sa   Cambaro.

Sa pasiunang imbestigasyon sa kapolisan sa Station 5 nasayran nga mga alas 4:17 sa milabay’ng hapon samtang naglakaw si Maritoni Fernandez, 17, sa maong dapit ang mga suspetsado kalit lang miduol kaniya nga nagtion og armas de fuego ug mideklarar nga tulis.

Gumikan sa kahadlok wala makalihok ang biktima ug milampos ang tulo ka tulisan sa pagsakmit sa iyang cell phone ug bag dayong pahilayo sa maong dapit. Gitaho dayon ni Fernandez   sa kapolisan ang maong hitabo ug dihang milihok ang mga otoridad dali kaayong nasigpatan ang tulo   busa gisikop dayon ug gibalhog sa prisohan.

Nakuha pagbalik sa kapolisan ang tanang mga butang nga iya ni Fernandez gikan sa posisyon ni Cabreros lakip na ang cell phone niini. Lakip nga nasakmit sa kapolisan gikan sa mga suspetsado mao ang usa ka kalibre 22 magnum delinger .

Sa pagkakaron giandam na ang tukmang kaso nga ipasaka sa biktima batok sa mga suspek.   - (BANAT NEWS)