6 eskwelahan sa Lapu-Lapu napiling pilot sa safety drill for active attack

CEBU, Philippines — Unom ka eskwelahan sa Dakbayan sa Lapu-Lapu ang napiling pilot sites alang sa Nationwide Simultaneous School Safety Drill for Active Attack Incidents sa Septiyembre 3, 2026, samtang gipahugtan sa mga otoridad ang pagpangandam human sa mga pag-atake nga nahitabo sa mga eskwelahan sa ubang bahin sa nasud.

Ang mga pilot school sa junior ug senior high schools gilangkuban sa Babag, Bankal, Marigondon, Mactan, Pusok ug Sta. Rosa.

Sa wala pa ang drill, mopaubos ang mga eskwelahan og pre-orientation ug tabletop exercise sa Department of Education (DepEd) Lapu-Lapu City Division Office.

Apil sa maong kalihokan ang mga officials, Parent-Teacher Associations (PTAs), City Disaster Risk Reduction and Management Office (CDRRMO), Lapu-Lapu City Fire District, kapolisan, City Traffic Management Services (CTMS) ug uban pa’ng concerned agencies.

Gipatuman ang drill subay sa direktiba sa DepEd Central Office aron masuta ang kaandam sa mga eskwelahan ug ang koordinasyon sa mga ahensiya sa pag-atubang sa mga active attack incident.

Nakigtigom usab ang CDRRMO sa DepEd Lapu-Lapu City Division, Lapu-Lapu City Police Office (LCPO), CTMS ug uban pa’ng ahensiya aron repasohon ang contingency plan sa siyudad nga kaniadto pa’ng gipanghatag sa disaster risk reduction and management teams sa DepEd.

Kabahin usab sa kasamtangang school safety measures ang mandatory bag checking subay sa mga palisiya sa DepEd.

Matud sa hepe sa kapolisan sa siyudad Police Colonel Agosto Daskeo nga seryosohon sa kapolisan ang bisan unsang hulga nga may kalabotan sa mga eskwelahan ug moagi kini og hustong assessment ug imbestigasyon.

Makig-coordinate ang kapolisan sa mga concerned agency aron matino ang angay nga intervention kon gikinahanglan.

Samtang kagamhanan sa siyudad nagkanayon nga dili lang kutob sa drills ang pagpalig-on sa siguridad sa mga eskwelahan apan kinahanglan kini og padayong pagpangandam, response ug koordinasyon tali sa mga eskwelahan, ginikanan, law enforcement ug ubang ahensiya sa gobiyerno.

Samtang, gikonsidera usab sa siyudad ang dugang security measure sa mga eskwelahan lakip ang gisugyot nga pag-apod-apod og transparent school bags ngadto sa mga estudyante sa public schools sa sunod school year.

Matud ni Mayor Ma. Cynthia “Cindi” King-Chan nga mas sayon alang sa security personnel nga makita ang sulod sa bag atol sa entrance checks ug makatabang kini sa pag-ila sa mga gidili nga butang.

Si Chan nagkanayon nga gikonsiderar ang transparent bags isip puli sa royal blue school bags nga gipang-apod-apod sa city government niining school year.

Kabahin ang gisugyot nga bags sa plano sa siyudad nga ipadayon ang free school supplies distribution program nga nakabenepisyo sa tanang 105,000 ka estudyante.

Dugang ni Chan nga tumong sa maong lakang nga mapalig-on ang siguridad sa public schools ug mahatagan og dugang kasigurohan ang mga ginikanan kabahin sa kaluwasan sa ilang mga anak. — /BDB (BANAT NEWS)