Laing biktima sa trafficking naluwas

CEBU, Philippines - Nunot niining gihingusgang kampanya batok human trafficking sa Sugbu, laing grupo sa mga batan-on ang na-rescue kagahapon sa Maritime Police diha sa Pier 4 ning dakbayan.

Ang mga naluwas mao ang tulo ka babayeng menor de edad ug duha ka bayot nga 15 ngadto sa 17-anyos ug ang usa ka 23-anyos ug pulos taga dakbayan sa Toledo.

Si PO1 Cedric Macalisang sa Maritime Police sa pakighinabi sa Banat News nagkanayon nga nakadawat sila’g impormasyon nga adunay mga batang nagtapok sa maong lugar hinungdan nga ilang gisusi. Ang mga bata nga nagsakay na og barkong padulong sa Manila ug mitug-an nga adunay tawong mosugat kanila didto.

Matud pa ni Macalisang nga ang mga bata mitug-ang gikuha lang sila gikan sa syudad sa Toledo ug gisaraang pasudlon og trabaho sa usa ka restaurant apan pag-abot sa pantalan igo lang silang gipasakay sa tawong mi-pickup kanila sa Toledo .

Ang Maritime Police padayon karon sa ilang imbestigasyon pagsubay si kinsa ang nag-recruit sa mga bata.

Dugang pa ni Macalisang nga ang lima nagpasalamat og dako kanila human nila esplikahi sa posibleng mahitabo unya kanila ngadto sa Manila .

Kahinumduman nga niadtong Biyernes kinse usab ka batan-on ang naluwas sa Maritime Police nga gikatakdang dad-on usab sa Manila, kagahapon gipasakaan og kasong kalapasan sa Anti-Human Trafficking in Persons Act of 2003 ang manag-inahang mi-recruit kanila kagahapon.

Sa mga nanglabay’ng mga report, pipila sa mga minor de edad nga nasakpang nanarbaho sa mga bars ug balay kahilayan sa kaulohan pulos biktima sa susamang modus operandi. (BANATNEWS)