CEBU, Philippines - Tulo ka tawo ang nangaangol human mibasiyo ang brake sa usa ka 10-wheeler truck ug midaro sa usa ka taksi ug laing usa ka pribadong sakyanan una pa misampak sa usa ka balay kagahapon sa hapon diha sa Veterans Drive sa barangay Apas ning dakbayan.
Ang mga nangaangol mao ang duha ka truck boy nga unang gisalbar sa mga sakop sa Apas Emergency Response Team (AERT) nga giilang sila si Remegildo "Bebot" Pimentel ug Elson Bravo, pulos mga trabahante sa Ocean Transport.
Samtang nagrabehan usab ang driver nilang si Jerwin Capilitan kinsa napiit sa iyang gilingkuran ug sa bungbong sa balay nga gipanag-iya sa pamilyang Tion ug ang grupo na sa Emergency Rescue Unit Foundation (ERUF) maoy nakaugkat kaniya human sa usa ka oras nga operasyon.
Ang trailer van nga giingong gipanag-iya sa usa ka Jerry Uy gikan sa Maria Luisa subdivision sa Busay nga nagkarga og mga limestone.
Matud pa nga ang mekaniko sa maong kompanya nga si Mario Guardiana nga nagsunod sakay sa usa ka multicab nagkanayon nga iyaha nang gipasidan-an si Capilitan nga mag-low gear tungod kay mireklamo na ang naulahi nga may depekto ang air supply sa ilang brake.
"Nagsunod mi nila sakay mi sa multicab , hinay pa ang ilang dagan apan pag-abot diha sa Marco Polo Hotel nikusog ang dagan duda ko nag-change gear to ang driver mao na ang pag apply og brake ug pagbalik sa primera (first gear) maglisod na siya (Capilitan)" matud pang Guardiana.
Unang napunggit sa trak ang usa ka taksi, ug sunod naigo ang laing pribadong sakyanan, hinuon wala maunsa ang mga sakay niini dayon nalahos sa balay ni Miedy Tion ug midaro usab sa poste sa kuryente.
Mipasalig hinuon si Carmelita Bulanon, ang representante sa Ocean Transport nga abagahon ang gastos sa mga nangaangol ug nangadanyos nga kabtangan.
Ang aksidente mimugna og grabeng pagbara sa trapiko sa maong dapit tungod kay nabara ang trak sa usa ka lane sa maong dapit. Ang mga nangaangol gidala na sa Perpetual Soccour Hospital.(EIM) (BANAT NEWS)