Pamilya sa natumbahan sa buli gitabangan

CEBU, Philippines - Nagkantidad og P15,000 nga financial assistance nga ihatag ngadto sa mga pamilya sa tulo ka mga tawong   namatay human dat-ugi sa punoan sa buli nga natumba didto sa   sitio Kalubihan sa barangay Labogon, dakbayan sa Mandaue sa miaging semana.

Kini maoy girekomendar ni Violita Cavada nga maoy City Social Welfare Officer sa Mandaue ngadto kang Mayor Jonas Cortes.

Ang maong kantidad maoy dugang nga tabang sa Social Welfare Office ngadto sa pamilya sa mga biktima kinsa nakadawat na og pasiunang hinabang gikan sa lokal nga kagamhanan sa maong dakbayan.

Ang maong hinabang   naglakip sa ilang inadlaw nga pagkaon ug pagpahimutang sa patay’ng lawas sa tulo ka biktima ngadto sa ilang katapusang pahulayanan.

Si Barangay Kapitan Damaso Tumulak sa Labogon mibutyag sa Banat News nga nagpadayon ang ilang paghatag og tabang sa mga pamilya nila ni Romeo Dimpas, Teresa Dimpas ug Richard Gerodias.

Matud pa ni Tumulak nga ang salapi nga itabang nila ngadto sa mga pamilyang nagbangutan adto nila kuhaa sa ilang kaugalingong calamity fund.

Si Kapitan Tumulak miingon nga nagtungha sa Consolacion National High School ang bugtong anak nga babaye sa magtiayong Dimpas.

Samtang ang biyuda ni Gerodias may dos anyos pa nga anak, ug kining tanan maoy tabanganan sa kagamhanan. (BANAT NEWS)