CEBU, Philippines - Giulo pagpusil patay ang usa ka drayber sa traysikol sa gidudahang iyaha rang mga pasahero ug gibiyaang nagbuy-od sa karsada sa barangay Talavera siyudad sa Toledo kagahapon sa ala 1:00 sa kaadlwon.
Ang biktima nga patay na dihang nakit-an mao si Sergio Sismondo, 54, taga Baybay-1, Poblacion siyudad sa Toledo nga drayber sa traysikol. Samtang tulo ka mga batan-on nga gidudahang pasahero ra sa biktima nga maoy uwahing nakit-ang pasahero niini maoy kasamtangang gipangita sa kapolisan.
Matud ni SPO1 Jemelon Cotmaya sa Toledo City Police Station dihang nahinabi sa Banat News subay sa imbestigasyon nakabati og usa ka lanog nga buto sa armas ang mga residente.
Paglabay sa pipila ka minutos nadiskubrehan nalang sa mga tawo nga nahaagi sa maong lugar ang biktima nga nagbuy-od na sa karsada tupad sa iyang traysikol nga nagkadugo.
Daling gipahibawo ang kapulisan ug sa ilang pagresponde namatay na kini. Dugang nahipos nga impormasyon sa kapulisan nga samtang namasahero ang biktima gituohang nasakyan kini sa gibanabanang tulo ka mga batan-on.
Dunay pagdudang posibleng nagkalalis ang biktima ug mga pasahero niini sa pletihan hinungdan sa maong pagpamusil sanglit wala kuhaa ang kinitaan, pitaka, cellphone ug relo niini. (BANAT NEWS)