Abogado sa mga Sanchez gihulipan

CEBU, Philippines - Gipatangtang ni Engr. Grecilda Sanchez-Zaballero si Atty. Oliveros Kintanar isip manlalaban sa kaso nga gipasaka sa namatay na niyang amahan nga si kanhi Bise-Gob. Gregorio Sanchez, Jr. batok ni Gob. Gwendolyn Garcia.

Atol unta sa katapusang adlaw sa husay sa Department of Interior and Local Government, gipadayag ni Zaballero ngadto kang hearing officer Ranny Spencer-Palisok nga si iyang gitangtang si Kintanar.

Kini human sa nahitabong pag-initay sa miaging adlaw tali ni Kintanar ug sa kaatbang nga Atty. Rory Jon Sepulveda sa habig ni Garcia.

Mihangyo si Zaballero nga hatagan siya og tulo ka semana sa pagpangita og laing abogado ug kini giuyunan usab sa habig ni Garcia. Ang anak ni Garcia, Atty. Ma. Esperanza Christina Garcia-Codilla Frasco, namahayag usab nga mas maayong ioktaba ang laing husay sa kaso aron kahatagan usab og higayon ang habig ni Sanchez nga makapangita og laing abogado.

Ang pagtangtang ni Zaballero kang Kintanar nakapakugang dili lang sa habig ni Garcia lakip na mismo sa pamilya ni Sanchez ug sa mga sakop sa media.

Gani miabot ang igsuon ni Sanchez nga si Edna Sanchez sa buhatan sa DILG-7 aron unta pagtambong sa husay apan dako nalang iyang katingala nga nakauli na ang iyang pag-umangkon nga si Zaballero nga wala lang gani siya tawagi.

Lakip sa nasurpresa sa kausaban mao si Kapitan Yody Sanchez sa barangay Busay, dakbayan sa Sugbo nga nagsunod pag-abot sa iyang iyaan. Nakalitan usab si Kintanar sa hukom ni Zaballero apan sa ilang panag-estoryahanay, siya mipahibawo nga may nakab-ot na sila nga “mutual understanding” sa paghulip kaniya.

Si Kintanar ang miabag kang Sanchez sa pagsang-at og reklamo sa DILG ug sa Malakanyang batok kang Garcia nunot sa giingong pagpanapaw niini sa iyang gahom isip bise-gobernador. (BANATNEWS)