CEBU, Philippines - Nagsugod na ang mga ginikanan, mga magtutudlo, mga tinun-an ug mga nagkadaiyang organisasyon sa pagpanglimpyo sa mga pampublikong tunghaan sa Central Visayas sugod kagahapong adlawa.
Ang mga kadagkoan sa Department of Education-7(DepEd) mipahigayon og mga motorkada sa nagkadaiyang mga barangay nga nasakop sa mga pangpublikong mga tunghaan nga gisugdan sukad pa niadtong 2003.
Kagahapon ang Hipodromo Elementary School nagsugod na sa ilang Brigada Eskwela ug gisugdan na sa mga ginikanan ug mga tinun-an uban sa mga magtutudlo ang pagpanglimpyo.
Tumong niini aron andam na ang mga tunghaan ini og sugod gyud sa klase karong Hunyo 6 ug dili mahurot ang panahon sa pagpanglimpyo sumala pa ni Leah Apao ang information officer sa DepEd-7.
Usa sa mga nakitang problema mao ang kakulang sa mga pansayan, mga bangko ug uban pang gamit sa mga tinun-an ug magtutudlo.
Matud pang Apao nga dako og matabang niining problemaha ang Parents Teachers and Community Association (PTCA) pinaagi sa ilang donasyon.
Nunot niini nangandam na usab ang kapulisan sa subling pagbukas sa klase karung sunod buwan ug miimplementar na sa ilang Oplan Balik Eskwela.
Subay sa kamandoan ni PNP Chief Raul Bacalzo mopakatap sila og mga polis sa nagkadaiyang tunghaan ug sa mga dapit diin dugokon og mga tawo sama sa mga baligyaanan og mga school supplies. (Sanden Anadia ug Rey B. Pasaporte/EIM)
Bata 8, nalumos sa baha
Ni Lesley Caminade-Vestil
Usa ka 8-anyos nga batang lalaki namatay human kini mahagbong sa kanal ug nalumos sa baha mugna sa kusog nga uwan sa barangay Banilad dakbayan sa Mandaue kagahapon sa hapon.
Sa report sa Balitang Bisdak, giila ang biktima nga si Curt Cabucos, 8, nga taga Banilad.
Nasayran nga si Cabucos nagduwa sa ulan kagahapon sa hapon ug sa dihang milabang kini sa kanal subay sa usa ka latayan, nadakin-as siya ug nahagbong sa kanal busa nalumos sa baha.
Gisuwayan og dala sa mga kabanay ang biktima ngadto sa Mandaue City District Hospital apan gideklarar kining patay na. (BANATNEWS)