CEBU, Philippines - Human sa pagsaulog sa Kadaugan sa Mactan niadtong Miyerkules ang konseho sa dakbayan sa Lapulapu miduso og resolusyon sa temporaryong pagpasira sa parte sa dalan sa M.L. Quezon highway ilabi na diha sa karaang Mactan Bridge ngadto sa Marcelo Fernan Bridge karong adlawa Abril 29, 2011.
Ang maong pagpasira niini gihimo tungod sa pagpahigayon sa labing unang kasaulogan sa Kadaugan Street Party (KSP). Kini gipanglantawang mamahimo nang tinuig nga kalihukan matag timaan sa kadaugan sa labing unang bayaning Filipino nga si Datu Lapulapu.
Si Lapulapu maoy mibuntog sa langyaw’ng mananakop nga si Ferdinand Magellan niadtong Abril 27, 1521.
Karong Abril 29 (karong adlawa), pasirad-an ang maong dalan gikan sa alas 7:00 unyang gabii hangtud Abril 30, 2011 sa ala 1:00 sa kaadlawon.
Ugmang adlawa (Abril 30) subling sirad-an ang maong dalan sugod alas-3 sa hapon hangtud sa Mayo 1 sa alas-3 sa kaadlawon.
Ang KSP diha sa nahisgutang karsada atol sa pagsira ipahigayon ang Car Show, Rampada Dance Show, Tricycle Contest, Live Band Concerts ug uban pang exciting ug historical activities.
Tuyo sa dakbayan pinaagi ni Konsehal Harry Don Radaza kinsa maoy tsirman sa maong KSP ang seguridad ug kahapsay sa maong kalihukan atol sa maong kasaulogan.
Hinuon ang mga motoristang gikan sa Mactan Bridge dili maapektahan ingon man ang mga sakyanan gikan sa Basak padulong sa airport o ba kaha sa Mepz 1. (/EIM) (BANAT NEWS)