Bata nga naatrasan sa nagduwag volleyball namatay
CEBU, Philippines - Patay ang usa ka 3 –anyos nga batang lalaki human kini madumbuli sa nagduwa og volleyball pasado alas-4 sa miaging hapon sa sitio Lower Purok 8 barangay Camputhaw.
Ang biktima nailhan nga si Jenniel Zubiri, 3, molupyo sa maong lugar samtang ang nakadumbol kaniya mao si Renante Misa, 28, molupyo usab sa maong lugar.
Sa gihimong imbestigasyon sa kapolisan, nasayran nga ang suspetsado uban sa kaubanan niini nagkalingaw og duwa og volleyball sa ilang lugar niadtong tungura dihang kalit lang nga misulod ang bata sa volleyball court. Naatol usab nga niadtong tungora mao puy pag-atras ni Misa ug naigo ang bata, tungod sa kakusog sa pagkadumbol nalagpot ang bata ug natumba apan giingong nabunal ang ulo niini sa sementadong korte.
Ang bata gidali pagdala sa Vicente Sotto Memorial Medical Center apan gideklarar kini nga dead on arrival tungod sa naangkon niini nga kadaot sa iyang ulo.
Samtang ang suspetsado mitahan usab sa iyang kaugalingon ngadto sa mga tanod nga anaa sa maong lugar niadtong tungura. (BANAT NEWS)
- Latest
- Trending