Kaso sa Ellah Joy hapit na ipasaka

CEBU, Philippines - Gipaninguha karon sa Task force Ellah Joy nga ila nang masang-at ang kaso batok sa posibleng responsabli sa pagdagit ug pagpatay sa 6-anyos nga bata didto sa lungsod sa Minglanilla sa dili pa matapos kining buwana.

Mao kini gibutyag kagahapon ni Sr. Supt. Patrocinio Commendador, hepe Cebu Provincial Police Office kinsa mipasabot nga kun ugaling dili pa maabot ang resulta sa ilang gisang-at nga motion to take custody of the evidences gikan sa korte posibling ila na gayud nga ipasaka ang kaso.

Gihulagway ni Comendador nga lig-on na ang ilang mga gihuptan nga ebidensya apan mas nindot gayud kun unta tugotan sila sa korte nga makasang-at sila sa ilang mosyon.

Midugang usab si Comendador nga andam na sila sa ilang pagpasaka og kaso, gani kompleto na ang mga affidavit sa mga saksi ug uban pa.

Samtang si manlalaban Frank Malilong ug si Renante Pique ang amahan ni Ellah Joy nagkuyog nga miduaw sa buhatan ni Comendador ug nangumusta sa kahimtang sa kaso.

Matud pa ni Malilong nga igo lang niya nga gikuyogan si Pique isip suod nga higala aron sa pagsusi sa dugang kalamboan sa maong kaso.

Midugang si Malilong nga sa iyang nasayran dako ang iyang gibati nga kalipay sa gihimo karon ni Comendador gani iyang napanglantawan nga angayan gayud nga hatagan og pasidungog si Comendador sa nabuhat niini sa maong kaso.

Samtang gipadayag usab ni Malilong nga gibati siya og katagbaw sa nahimo karon sa Task Force Ellah Joy.

Si Pique sa iyang bahin, nagpaabot nalang usab sa task force kun kanus-a gayud ipasaka ang maong kaso apan iya gayud nga gihulagway nga dako ang iyang pagsalig sa gihimo karon sa kapolisan.

Matud pa ni Pique nga dako usab ang iyang pagsalig sa kapolisan ilabi na sa mga nakuha niining ebidensya nga magamit gayud sa pagsang-at og kaso. “Salig ko nila sa ebidensya nga ilang nakuha,” mipasabot si Pique.

Samtang si Comendador mibutyag usab nga gawas sa mga ebidensya, anaa usab ang mga affidavit ug gani ang karaang mga saksi anaa usab diin ang duha niini iyang gikuhaan og pamahayag nga giisip niyang ‘very credible’.  - BANAT NEWS