CEBU, Philippines - Nagkadaghan ang reklamo sa gubaong mga dalan nga nagtadlas sa kabarangayan sa barangay Basak, Marigondon, Suba-Basbas ug uban pa sa Lapulapu.
Si Mayor Paz Radaza nga nahinabi sa mga tigbalita niadtong miaging adlaw miingon nga ilang gipaningkamutan nga matagad ang mga reklamo sa mga motorista. Nunot niining maong reklamo iyang gipasabot sa ang nag-unang hinungdan sa pagkaguba sa mga dalan sa dakbayan mao ang mga developers nga nagbaton og mga dagkong sakyanan.
Matud pa ni Radaza nga aduna na silay kasabutan tali sa mga developers og mga subdivisions nga silay mopaayo sa mga dalan sa dakbayan nga nangaguba tungod sa kanunay nga paglabay sa ilang mga sakyanan.
Samtang giklaro niyang adunay mga programa nga gihimo ang dakbayan aron ayuhon ang mga nangagubang dalan apan nahunong lang kini tungod sa kanunay nga pagdaut sa panahon. (BANATNEWS)