CEBU, Philippines - Aron sa paglikay sa problema sa umaabot, ang kagamhanan sa dakbayan sa Talisay mituon bahin sa kontrobersiyal nga lote nga gitarokan sa karaang merkado publiko sa barangay Tabunok.
Ang nahisgutang lote giingong gidonar sa usa ka pribadong indibidwal kaniadto alang sa merkado apan giingong mahimo kining bawion kun dili na gamiton sa maong katuyoan.
Ang Public Information Officer sa Talisay nga si Arturo Bas nagkanayon nga dili buot sa kagamhanan nga sa umaabot nga panahon motumaw ang mga problema sama sa nahitabo sa mga lote sa karaang Lahug Airport nga karon I.T. Park na, diin ang mga kanhing tag-iya sa mga lote mihangyo ngadto sa Korte nga ibaligya pagbalik ngadto kanila ang lote sa samang presyo dihang gi-expropriate kini sukad nga nabiyaan kini sa gobiyerno.
Ang nahisgutang lote sa karaang merkado sa Tabunok ug sa parking area sa mga traysikol dunay gilapdon nga 13,553 square meters.
Sayo niini si kanhi Board member Raul Bacaltos mibutyag nga ang nahisgutang lote gipanag-iya sa pamilyang Nacario ug gidonar kini niadtong 1950 aron matukod ang merkado publiko ubos sa pagdumala ni anhing mayor Rafael Rabaya.
Apan si Bas nagkanayon nga wala pa sila makakita sa kopya sa deed of donation ug mao kini susihon sa kagamhanan sa Talisay.
Karong may gitukod na ang kagamhanan sa dakbayan nga bag-ong merkado publiko sa barangay Lagtang, si Bacaltos mipasidaan sa kagamhanan sa siyudad mahimo kining problema kung ang nahisgutang lote ibaligya sa Talisay o paabangan sa pribadong kompaniya.
Si Bas midugang nga ang siyudad wala pay plano kung unsay gamitan sa maong lote kung dili na kini gamiton nga merkado. - BANAT NEWS