2 angol sa pagpamusil

CEBU, Philippines - Duha ka tawo ang naangol sa pagpamusil nga nahitabo didto sa barangay Tejero ning dakbayan sa Sugbo kagahapon pasado alas 12:00 sa hapon.

Ang mga biktima nailhan nga si Royal Castillo, 29, ug Cesar Gadiano, 59, pulos molupyo sa maong lugar, samtang ang suspetsado nailhan usab nga si Jerbie Sianson silingan ra sa mga biktima.

Matud pa ni PO2 Edario Manatad sa homicide section sa Cebu City Police Office, nga ang gipunting sa pagpusil sa suspetsado mao si Castillo apan may saag nga bala nga nakaigo kang Gadiano kinsa naglingkod ra sa daplin sa karsada niadtong tungora.

Sumala kang PO2 Manatad nga naglakaw sa maong lugar si Castillo dihang kalit lang mipatim-aw ang suspetsado ug sa walay igong hinungdan giluthang kini ug nasabak ang ulo ug sa walang bahin sa iyang lawas.

Samtang si Gadiano nasabak usab sa walang dapi-dapi sa usa ka saag nga bala.

Dihang nakita sa suspetsado nga pulos mipiliit sa kasakit sa agi sa bala ang duha ka biktima, mikabad kini og dagan pahilayo sa maong lugar.

Si Castillo didto dad-a sa Perpetual Soccour Hospital samtang si Gadiano didto usab ihatod sa Cebu City Medical Center.

Apan matud pa sa kapolisan nga sa pagsuwat ning maong balita diha sa talandugon nga kahimtang si Castillo tungod sa pagkaigo sa bagolbagol niini.

Sa lugar nga nahitaboan nakapunit ang kapolisan og duha ka kabhang sa mga bala sa .9mm nga kalibre sa armas.

Matud pa ni Manatad nga posibleng may labot sa ginadiling drugas ang hinungdan sa maong pagpamusil.

Kini tungod kay may mga record na bahin sa pamatigayon sa ilegal nga drugas si Castillo ug ang suspetsado nga si Sianson.

Gawas sa illegal nga drugas, may mga record usab ang duha bahin sa pagpamusil nga na-blotter sa kapolisan sa dakbayan sa Sugbo.

Si Gadiano sa laing bahin wala untay labot sa maong pagpamusil apan napagan lamang kini kay nagpungko kini sa daplin sa karsada dihang giluthang ni Sianson si Castillo.

Ang mga saksi nga mga silingan sa biktima ug suspetsado nagkanayon nga dugay nang nagkabangi ang duha ug gituohan nga dumot ang hinungdan niini.

Apan sa bahin ni PO2 Manatad nga ang bangi sa duha naggumikan sa pamatigayon sa ginadiling drugas.

Sa pagkakaron gipangita pa sa kapolisan ang suspetsado. - BANAT NEWS