CEBU, Philippines - Gipanghingusgan karon sa Cebu City Agriculture ang pagpalambo sa ilang mga plano ug serbisyo alang sa kauswagan sa mga mag-uuma diin usa niini mao ang pagpatukod og Nursery Production Program .
Ang maong programa magdasig sa mga mag-uuma nga mag-atiman og mga prutas.
Migahin og P1.8 hangtod P2 milyones ang budget nga gigahin sa City Agriculture alang sa maong programa sa tinguha nga masuportahan ang suplay sa tanom nga ipang-apod apod sa nagkadaiyang barangay.
Matud pa ni City Agriculturist Joelito Baclayon nga kinahanglan na usab karon nga magkat-on ang mga batan-on kun unsaon pagpananom aron aduna sila’y alternatibong buhaton ug sa susamang higayon, makatabang usab sila sa produksiyon sa pagkaon.
Sumala pa niya nga kinahanglang ang mga batan-on maoy mohulip sa mga tiguwang na nga mga mag-uuma nga dili na makasugakod unya sa pagtikad sa ilang mga baol.
Kini pinaagi sa pagpaniid unsaon sa paggalam og mga tanom ilabi na sa mga kahoy nga mohatag og maayong prutas alang sa pagkaon. “Usa gyud na sa among programa nga gihingusgan karon nga makakat-on ang mga batan-on bisan sa basic lang nga pagpananom,” nagkanayon si Baclayon.
Malipayon usab nga gipahibalo ni Baclayon nga maayo ang istado sa industriya sa lubi karon sa Sugbo ug gani adunay laing nasud nga nagplano nga dinhi sa Sugbo mo-order og lubi busa dako na kaayo kining tabang sa kalamboan sa ekonomiya sa siyudad. - Monnahlie Olandria ug Sanden J. Anadia (BANAT NEWS)