CEBU, Philippines - Gipaabot nga mabalik ang kinatibuk-ang suplay nga 216 megawatts sa kuryente gikan sa Cebu Energy Development Corporation human maguba ang ilang switchyard diha sa dakbayan sa Toledo tungod sa pagbunok sa kusog nga uwan niadtong Enero 1 sa gabii.
Si Mae Melchor, ang tigpamaba sa CEDC sa gipadalang text message sa Banat News nagkanayon nga gipaspasan karon sa ilang operators ang pag-ayo sa switchyard aron mabalik ang operasyon karong adlawa.
Ang CEDC nagsuplay og kuryente diha sa National Grid Corporation kinsa mao usab ang nagdala sa maong kuryente ngadto sa nagkadaiyang power distributors sa Sugbu sama sa Visayan Electric Cooperative ug uban pa.
Ang CEDC aduna nay tulo ka mga power generating unit nga gagamit og coal fuel diin ang usa niini nga makahatag og 82 megawatts niadto lamang Disyembre 24 sa milabay’ng tuig gipaandar ug na-synchronized sa duha nila ka mga units.
Ang CEDC mipasalig hinuon nga sa tuig 2011 magpadayon ang pagsuplay nila sa enerhiya ngadto sa mga konsumidor. - BANAT NEWS