Grupo sa manglungkabay 'dakpan

CEBU, Philippines - Nadakpan sa mga tanod ug kapulisan ang grupo sa mga kawatan nga maoy gitumbok nga responsable sa pagpanglungkab ug pagpangawat og mga karneng baboy sa merkado publiko sa lungsod sa Pinamungajan kagahapon sa ala 1:30 sa kaadlawon.

Ang mga nadakpan sa akto nga nagkarga sa sobra 30 kilong karneng baboy nga ilang kinawat mao sila si Jose Jimenez, drayber sa traysikad ug molupyo sa barangay Duwangan; Gregorio Bemos, molupyo sa barangay Rizal ug ang nakaeskapo naila lang sa pangalan nga Richard taga siyudad sa Toledo.

Matud pa ni PO2 Dave Talaboc sa Pinamungajan Police Station dihang nahinabi sa Banat News ang maong grupo dugay nang gipanid-an sa mga tanod sa maong lugar ug sa kapulisan.

Sila maoy gidudahan sa mga nagsunod nga pagpanglungkab ug pagpangawat sa mga karneng baboy ug manok sa merkado nga panghipuson sa mga meat vendors diha sa ilang mga freezers.

Samtang nag-inom ang mga suspek wala sila makamatikod nga gipanid-an na sila sa mga tanod ug nianang pagkalawom na sa kagabhion ang nakaeskapong si Richard nakit-ang milungkab sa freezer sa usa ka Marites Saban, negosyante og karne.

Matud pa nga nakit-an sila nga gipangsulod sa grupo ang mga gi-frozen nga karneng baboy paingon na unta nila kining ikarga sa traysikad, gidakop dayon sila sa mga tanod.

Apan si Richard nakahigayon paglugnot ug nakadagan pahilayo ug bugtong sila si Jimenez lang ug Bemos ang nabalhog sa karsel ug gihikay na ang kasong ipasaka batok nila.

Lakip sa gituohang nabiktima sa mga suspek mao ang tindahan sa barangay kapitan nga si Edgar Quiakung nga gikawatan usab og mga karne ug longanisa. – BANAT NEWS