Mga stall sa Ramos market gipamiyaan kay nanga-alkanse

CEBU, Philippines - Gipangbiyaan sa mga vendors ang mga stall sa Ramos Public Market sa barangay Ramos, siyudad sa Sugbo tungod sa kakulang sa agianan.

Si assistant market administrator Rene Sanapo nagkanayon nga ubay-ubay na sa mga stall owners sa Ramos ang namiya sa ilang gi-okupahan nga mga puwesto tungod sa dako nilang alkanse sa ilang negosyo.

Si Sanapo nagkanayon nga ang kakulang sa access road sa maong public market maoy nag-unang hinungdan nga makagasto sila og dako aron sa pagdiskarga sa ilang mga produktong ibaligya.

Tungod usab sa kakulang sa agianan, maglisod sa pagsulod ang mga kustomer.

Si Sanapo nagkanayon nga ang maong problema ipadangat unya ngadto ni Mayor Michael Rama aron mahatagan og dinaliang aksiyon.

Usa sa gitutokan niining kasulbaran mao ang paghimo og rota sa trapiko nga makatuyok ang mga PUJ.

Ang board member sa Nagkahiusang Drayber sa Sugbo (NADSU) nga si Eduardo Geolin nagkanayon nga angayan susihon sa kagamhanan ang ugat sa problema ug iya usab nga giklaro nga dili solusyon ang pagbuhat og bag-ong rota sa maong dapit.

“Sa akong nabantayan, daghan man og PUJ ang mangagi diha, kung magpuno man gud og bag-ong rota, magpuno nasad og mga units,” matud pa ni Geolin.

Apan ang gikabalak-an ni Geolin nga basin makapuno na usab kini sa problema sa dagan sa trapiko sa siyudad kun mapun-an og bag-ong jeep alang sa bag-ong mga rota.

Dugang pa niya nga mas maayo nga dugangan og mga produkto ang maong mga merkado aron hugopan kini sa mga konsumidor.

“Sama sa Carbon, halos kumpleto ang ilang mga baligya, seguro ang makadani sa mga tawo ang daghang baligya aron dili na sila moadto og layo pa nga mga merkado,” panapos pa ni Geolin. (Chester Abadilla ug Sanden J. Anadia) (BANATNEWS)