Bayad sa Lapu PUJ terminal gipaubsan

CEBU, Philippines - Gipaubsan sa konseho sa dakbayan sa Lapulapu ang bayranan sa mga PUJ matag biyahe sulod sa Lapulapu PUJ Terminal.

Matud pa ni Mayor Paz Radaza nga human sa ilang panagtagbo sa mga sakop sa PUJ drivers association sa dakbayan sa Lapulapu nakahukom siyang ipaabot sa konseho ang paghatag og pagtugot sa pagpaubos sa bayranan sa mga PUJ drivers sa ilang matag biyahe gikan sa P20 ngadto sa P10 na lang.

Atol sa regular session sa konseho sa dakbayan, gihukman kining tugotan ang pagminus sa bayranan matag biyahe sa mga PUJ drivers nga mobiya sa PUJ terminal.

Kahinumduman, nag-welga niadtong milabay’ng semana ang mga PUJ drivers sa Lapulapu apan wala kini magsilbe gumikan sa pagbutang og mga bus ug mga sakyanan sa barangay nga kasakyan sa mga residente sa Lapulapu nga naapektuhan sa strike.

Base sa reklamo sa mga PUJ drivers, dako ra kaayo ang nalatid sa ordinansa nga P20 matag biyahe nga adto kuhaon sa kinitaan nga alang unta sa ilang pamilya.

Gumikan sa maong strike, si Mayor Radaza nasuko gumikan sa kinalit-kalit nga hukom sa mga drayber nga wala gani makigtagbo ngadto sa lokal nga kagamhanan sa Lapulapu.

Ang pagtugot sa konseho sa pagpaubos sa bayranan sa mga PUJ drivers nakapalipay sa mga drayber ug misaad nga motuman sa bag-ong bayranan nga nalatid sa maong ordinansa. (BANATNEWS)