'Nanagpa' nga opisyal ipatangtang ni Rama

CEBU, Philippines - Ipatangtang ni Mayor Michael Rama ang hepe sa homicide section sa Cebu City Police Office tungod sa giingong pagpanagpa niini ngadto sa usa ka babayeng reporter niining pamantalaan niadtong adlaw nga Lunes.

Ang buot nga ipatangtang ni Rama mao si Chief Insp. Vicente Velasquez tungod sa giingong pagsagpa niini sa babayeng staff reporter niining pamantalaan ug reporter sa DyLA nga si Lesley Caminade human mihangyong mokuyog kun adunay respondehang alarma.

Ang maong opisyal nga nangayo na og pasaylo miesplikar nga wala niya kini tuyoa ug natapi lang ang nahitabo gumikan sa paghuna-huna niya nga nasunogan ang dapit sa iyang inahan sa T. Padilla.

Sumala pa ni Rama nga angayan nga papahawaon si Velasquez sa pagkahepe sa homicide section tungod kay dili rason ang kaguol ni Velasquez nga nasunog ang balay sa inahan aron lamang manapat ngadto sa reporter.

“I will not condone that. In the mean time he should be out of the position. He can not continue to be there,” sigon pa ni Rama sa interbyu sa DyRF. Gihulagway ni Rama ang gibuhat ni Velasquez nga usa ka salawayon tungod kay wala man gani makadapat ang mayor sa siyudad sa Sugbu ngadto sa mga reporter, si Velasquez pa kaha nga usa ka polis ug tigprotektar pa sa katawhan.

Dugang pa sa mayor nga iya unyang tawgon si outgoing CCPO director Patrocinio Comendador o ba kaha ang bag-ong hepe nga si Sr. Supt. Ramon Buenafe aron mohimo dayon og lakang batok sa nahisgutang police.  (BANATNEWS)