Balay naugdaw tungod sa mi-overheat nga electric fan

CEBU, Philippines - Gumikan sa mi-overheat nga electric fan nakan-an sa kayo ang usa ka balay didto sa BF Homes sa barangay Pajac, dakbayan sa Lapulapu kagahapon sa alas 8:00 pasado sa buntag.

Ang kaabtik sa mga bombero sa pagpawong sa kayo maoy nakasalbar sa balay ni Editha Sanchez, nga giabangan ni Miriam Gevero.

Si SFOl Atelano Beredo sa Lapulapu City Fire Station mibanabana nga mikabat sa P45,000 ang kantidad sa gikaon sa kayong materyales sa duha ka mga lawak sa maong balay.

Matud pa ni Beredo nga nasayran nga gumikan sa mi-overheat nga electric fan nga wala mapawong sulod sa pipila ka takna, misilaob kini ug mikatap dayon ang kayo sulod sa balay.

Maayo kay may nakapahibawo dayon sa kabomberohan sa dakbayan busa sama sa kilat ang ilang kaabtik, napawong ang kayo sulod lamang sa tulo ka minuto , wala maugdaw ang tibuok balay, wala usab kini makatakod ngadto sa mga silingang balay ug walay naangol, sumala pa ni Beredo. – BANAT NEWS