Noval nanumpa isip 'mayor' sa Compostela

CEBU, Philippines - Pormal nang nakapanumpa si Department of Interior on Local Government (DILG-7) regional director Pedro Noval atubangan ni Gob. Gwendolyn Garcia isip “caretaker mayor” sa lungsod sa Compostela sugod kagahapong adlawa.

Kini human usab pormal nga nakadawat og memorandum gikan ni DILG Undersecretary Austere Panadero nga nagtudlo kaniyang officer in charge sa maong lungsod samtang wala pay madeklarar ang Commission on Elections nga lehitimong elected officials gikan sa pagka-mayor hangtod na sa pagka-konsehal. Matud pa ni Noval nga nadawat niya ang kamanduan gikan ni Panadero pasado alas 11 kagahapon sa buntag ug milahos siya sa buhatan sa gobernadora aron manumpa.

Si Noval mipasalig sa gobernadora nga mahimong malinawon ang iyang pag-takeover sa lungsod. Dugang niya nga natawgan na niya si Mayor-elect Joel Quiño kinsa miingon kaniya nga andam siyang manaog sa municipal hall uban sa iyang mga kaubang mga konsehal ug mga supporters kun makita niini ang opisyal nga memorandum ug oath of office gikan sa gobernadora.

Dugang pa ni Noval nga dili na niya bag-o ang paglingkod isip caretaker mayor sa Compostela tungod kay nahimo usab siyang acting mayor sa lungsod sa Liloan sulod sa upat ka bulan gikan sa 1987-1988.

Samtang si Garcia mitambag kang Noval nga magpabiling neutral aron dili mosamot kasamok ang lungsod. (BANATNEWS)