CEBU, Philippines - Duha ka mga lalaki nga gikan pa nga mitambong og disco nangaangol human kini pamusila sa duha usab ka wala hiilhing lalaki didto sa sitio Masiwa sa barangay Marigondon, dakbayan sa Lapulapu sa miaging kaadlawon.
Ang mga biktima mao sila si Danilo Dano Taghoy, 23, ug Andrew Sollano Dejan, 29, kinsa pulos taga sitio Ylaya sa barangay Marigondon.
Si SPO3 Rex Ybanez sa homicide section sa kapolisan sa maong dakbayan sa iyang imbestigasyon, nasayran nga gikan pang mitambong og disco party sa maong dapit ang mga biktima. Unya nanggawas kini ug miadto sa usa ka tindahan ug nag-inom og pipila ka botelya sa ilimnong makahubog ug pagkahuman nanglakaw pauli sa ilang panimalay.
Samtang nanglakaw ang duha kalit lang mitumaw ang duha ka wala hiilhing lalaki ug mibabag sa dalan dayong pamusil niini ngadto sa mga biktima pinaagi sa .45 kalibreng pistola.
Si Taghoy naigo sa iyang walang abaga samtang si Dejan nasabak usab sa tuong dughan.
Ang mga biktima daling gihatod ngadto sa Mactan Doctor’s Hospital sa barangay Basak sa maong dakbayan, samtang padayon pang gipangita sa mga otoridad ang kriminal. (BANATNEWS)