LP caravan kuyogan ni Kris

CEBU, Philippines - Sa ikaduhang higayon, subling bisitahon ni Liberal Party presidential ug vice presidential candidate Benigno "Noynoy Aquino III ug Mar Roxas ang amihanang bahin sa lalawigan karung adlawa lakip na si gubernatorial Candidate Atty. Helario "Junjun" Davide III ug iyang running mate nga si incumbent vice governor Gregorio Sanchez Jr. ug niining tungura kauban na si Kris Aquino.

Si Ferliza Contratista, ang coordinator sa Good vs. Evil Brigade ug dayag nga misuporta sa LP mibutyag nga gawas kang Kris mokuyog usab sa caravan sila si Boy Abunda, Jade Madela ug Eric Santos.

Matud ni Contratista gikan sa Mactan ang team Noynoy ug Kris mosakay sa chopper ug modiretso sa lungsod sa Madridejos alang sa usa ka programa dayon isunod ang motorkada diha sa tibuok Bantayan Island uban sa mga kandidato sa lokal nga posisyon.

Lakip sa bisitahon sa grupo ang dakbayan sa Bogo alang sa proclamation rally sa public plaza, human niini molahos sila sa Danao City alang usab sa laing motorkada palibot sa siyudad ug mosunod ang dakbayan sa Lapulapu una pa sila mobalik sa kaulohan.

Sa pikas bahin, ugmang adlawa si Davide ug Sanchez mopahigayon og press conference diha sa Casino Español nga sugdan sa alas-10 ngadto sa alas 12 sa udto.

Ang tuyo niini mao nga ilang ipahibawo ang ‘meeting de avance' nga pagahimuon karung adlaw’ng Sabado. – BANAT NEWS