CEBU, Philippines - Gipahigayon kagahapong adlawa ang Honest and Peaceful Orderly Election (HOPE) peace covenant signing sa Cebu City Police Office nga gitambongan usab sa kapin napulo ka lokal nga kandidato sa dakbayan sa Sugbu.
Mitambong ang mga kandidato sa partidong Kugi Uswag Sugbo, Bando Osmeña Pundok Kauswagan ug ang pipila ka mga independenteng kandidato.
Ang mga kandidato mipirma sa maong peace covenant nga misaad og malaumong tunhay ug hapsay ang umaabot nga eleksyon ug silang mga kandidato nanumpang sila maoy mag-una sa pagpatuman sa kalinaw sa umaabot nga eleksyon.
Sa wala pa mipahigayon og pormal nga pagpirma sa ilang saad isip matarong ug matinud-anong kandidato gihatagan sila og pipila ka minutos nga makapadayag.
Ang pundok sa BOPK ug Kusug ingonman mga independenteng kandidato mibutyag nga dako ang ilang pagsuporta sa peace covenant aron usab sa malinawon ug walay pagpanikas nga piniliay.
Usa sa mga kandidato nanghinaot nga silang mga kandidato dili mag-siningkahay, miangkon usab kining dili kalikayang aduna gyuy binaba-ay tali sa mga kandidato apan mapasalamatong kutob ra niini ang nahitabo dili parehas sa ubang lugar sa nasud nga magpinatyanay na gayud.
Si Comelec north officer Atty. Marchell Sarno mipahimangno sa mga kandidato nga kun ugaling sila mapildi, dawaton kining bukas sa kasingkasing.
Dugang pa ni Sarno nga dili lang unta mogamit og kusog o pagpanakit sa ilang isig ka kandidato bisan paman sa personal nga pagpangatake ug ipatigbabaw ang matarong. – BANAT NEWS