Epekto sa huwaw gisusi, produksyon sa gatas maigo

CEBU, Philippines - Gimandoan ni Gov. Gwendolyn Garcia ang Provincial Agriculturist Office nga mopahigayon og pakisusi sa epekto sa El Niño phenomenon dinhi sa probinsiya sa Sugbu alang sa tukmang lakang nga himuon.

Sumala pa sa tigpamaba sa Kapitolyo Atty. Rory Jon Sepulveda nga may kamandoan na kang Provincial Agriculturist Necias Vicoy Jr. nga pagmonitor sa kahimtang sa mga umahan sa lalawigan.

Matud pa ni Sepulveda mohimo og data gathering ug kini ipresentar sa sunod nilang department head meeting sa adlaw’ng Lunes ug gikan sa maong data ibase ang mga lakang nga himuon.

Samtang gipahibawo usab niini nga ang pundong gitagana sa probinsiya alang sa pagkonkreto sa kadalanan probinsiyal ug barangay road ang na-release alang sa dinaliang pagpatuman niini.

Hinungdan nga ang nahibiling pundo igasto kini aron sa pagpalambo sa water system sa nagkadaiyang kalungsuran aron makapahimulos ang mga mag-uuma ug mga residente sa supply sa tubig ilabina nga nagsugod na ang pag-igo ang huwaw.

Ang waterworks sa kalungsoran mao karoy gitutukan sa Kapitolyo ug nag-una niini ang mga lungsod sa Carmen ug lungsod sa Badian. Gipaabot nga makadani usab kini og dugang investors tungod sa madalang kalamboan gumikan sa maayong suplay sa tubig.

Samtang sa laing bahin nabalaka na usab ang National Dairy Authority (NDA)-7 nga maapektahan ang kalidad sa gatas sa baka nunot niining El Nino.

Si NDA-7 regional director Grace Senas nagkanayon nga kun molanat pa og pipila ka buwan ang kainit hayan mamenosan ang supply sa tubig diha sa kabukiran nga makaapekto kaayo sa pag-sanitized sa mga baka aron mamentinar ang maayong kalidad sa ilang gatas ug gidaghanon sa makuha gikan sa mga baka.

Gawas niini, nagkanayon usab siya nga posibleng mangadaot ang mga tanom nga para lawog sa mga baka tungod sa kainit sa panahon nga nasinati karun. (Chester Abadilla ug Rey Pasaporte)