CEBU, Philippines - Gitutukan sa kapulisan sa lalawigan sa Sugbu ang report kabahin sa mga grupo sa armadong tawo nga naglihok sa kalungsuran aron dili na kini makahimo pa og krimen subay ning nagsingabot nga presidential ug local elections karong Mayo.
Kini maoy gibutyag ni Sr. Supt. Jesus Gaquing, director sa kapulisan sa lalawigan sa Sugbu nga sentro karon sa ilang operasyon human sa Disyembre ang pagpangita sa mga wanted nga naglihok sa kalungsuran.
Giangkon ni Gaquing, nga naghatag gyud nila'g problema ug labad sa ulo kining mga wanted nga mga tawo sanglit sagad sila maoy ireklamo sa mga molupyo nga kanunay'ng manghasi sa ilang mga dapit.
Partikular nga gitumbok sa director ang mga report kabahin sa mga armadong tawo diha sa habagatang bahin sa probinsiya sa Sugbu.
Wala isalikway ni Gaquing, nga posibleng maghatag og kasamok sa kalungsuran kining mga tawhana sa nagsingabot ang election hinungdan nga ilang paningkamutan nga madakpan sa dili pa ang election karong Mayo.
Gani sa pagkakaron gisugdan na usab og susi ang mga lungsod nga posibleng mabutang nga hotly contested areas karong election sa Mayo apan unya na kini mahibaw-an human unya sa tigom sa mga kadagkuan sa Commission on Elections (COMELEC) ug sa Philippine National Police (PNP) didto sa Kampo Crame. – BANAT NEWS