Magkaatbang nga politico nagsinayaway

CEBU, Philippines - Puwerting aligreha sa mga magkaatbang nga mga politiko sa dakbayan sa Mandaue dihang nagkaabot kini sa usa ka Christmas party ug nagkasinayaway didto sa Banilad Elementary School sa barangay Banilad sa miaging gabii. Ang maong mga politiko naglakip kang Kongresista Nerissa Soon Ruiz ug mga sakop usab ni Mayor Jonas Cortes.

Matud pa sa mga nakasaksi nga gipaningot og sayaw uban ang mga bahakhak ug katawa sa kalipay ang mga sakop sa duha ka partido kinsa nangandam na alang sa dakong sambunot politikanhon alang sa piniliay sa Mayo 2010.

Sa bahin ni Kapitan Glenn Bercede sa Banilad kinsa maoy kandidato sa pagka-bise mayor ni Cortes, nga basta panahon sa Pasko ihiklin nila ang mga panag-away, dinumtanay, pinaakay ug pinaksitay sa mga pagsaway.

Samtang si Ruiz nga makig-atbang usab kang Cortes sa umaabot nga piniliay gikuyogan ni Bise Mayor Carlo Fortuna ug mga kaubanan.

Matud pa nalingaw kaayo ang mga magtutudlong nagpasiugda sa maong party dihang misalida pag-ayo sa sinayaway sila sa Ruiz , Fortuna, Bercede ug ang ilang tagsatagsa ka kaubanan sa partido.

Ang panaggakos ug lamboslambos nga sinayaway maoy nakapalingaw pag-ayo sa mga nanan-aw sa ilang lapad nga pagsabot nga ang tanan pulos lamang inartista.

Kini tungod kay pagkahuman sa maong mga bahakahak ug kaaligre mopuli unya ang pagdinautay sa masigkaatbang nga mga politiko aron lamang sa pagkabig sa hunahuna sa katawhan nga sila maoy labing maayo ug ang kaatbang dili maayo.

Hinuon matud pa ni Bercede nga wala makakuyog sa maong party si Mayor Cortes tungod kay may gitambungan usab kining laing Christmas party niadtong higayona diha gihapon sa dakbayan.

Nasayran nga inigliwas sa Pasko ug Bag-ong Tuig anha na magsugod ang grabeng kombati sa pangampanya aron sukdon ang pulso sa katawhan sa dakbayan kun kinsay ilang pilion sa pagkamayaor tali ni Cortes ug ni Ruiz.   (Romeo T. Limpangog)    (BANATNEWS)