Gikang nanisko gipusil angol

CEBU, Philippines - Usa ka lalaki nga gikang nanisko nalandig sa tambalanan human pusila sa wala ilhing mamumuno didto sa barangay Cantibas, lungsod sa Balamban sa miaging kadlawon.

Ang biktima mao si Diosdado dela Concepcion, 30, ulitawo nga taga barangay Pondol.

Base sa imbestigasyon nila ni SPO3 Arvie Banate, PO3 Celso Diaz, ug PO2 Hannival Larida sa Balamban Police Station, nasayran nga si dela Concepcion gikan pa sa diskohan ug samtang nagpa-abot og sakyanan sa   daplin sa dalan, kalit lang gihunongan sa usa ka motorsiklo ug dihadiha gipusil ang biktima sa nagsakay niini.

Ang biktima kinsa nakaangkon og samad pinusilan sa tuo nga bahin sa paa, daling gihatod ngadto sa Balamban Provincial Hospital.

Kasamtangang gisuta pa sa mga kapolisan ang motibo sa maong pagpamusil ug gipangita pa nila karon ang criminal. – BANAT NEWS