Pugante nabalaka sa mga anak maong mieskapo

CEBU, Philippines - Nadakpan na og balik sa kapulisan ang nakaeskapong piniriso sa lungsod sa Ronda diha sa barangay Langin lungsod sa Ronda niadtong Domingo sa alas 9:20 sa buntag. Gikatahong nabalaka diay sa iyang mga anak ug kapuyo.

Matud pa ni PO3 Emerito Sansan sa Ronda Police dihang nahinabi sa Banat News nakadawat sila og impormasyon gikan sa ilang asset nga ang nakapugang si Fernandez Blanco, 24, niadtong milabay’ng semana nagtago diha sa usa ka balay sa gihinganlan og Lina sa barangay Langin.

Daling milusad og operasyon ang kapulisan sa maong lugar nga gilangkoban nila ni SPO1 Bertuldo Mansueto, PO3 Ranulfo Gabatan, PO1 Josephus Faunillan ug ang na eskapohan nga jailer nga si PO1 Benedicto Rubia ug nadakpan og balik ang suspek.

Atol sa pagsukit-sukit sa kapulisan gitug-an sa suspek nga napugos siya pag-eskapo aron magpakisayod kun asa na ang iyang kapuyo human nilakaw nga wala magpahibawo ug gibiyaan ang ilang duha ka mga anak.

Ang kapuyo niini gikatahong tighatud og pagkaon diha sa prisuhan sa suspek apan nahibulong nalang kini nga pila ka adlaw nang wala na maghatud og pagkaon kaniya maong mieskapo kini. Nasayran nga milarga dinhi sa siyudad sa Sugbo ang iyang asawa aron sa pagpanarbaho.

Ang suspek nag-atubang og kasong pagpangawat nga nakapuga niadtong Biyernes sa buntag dihang gisugo og palabay sa basura sa gawas nga bahin sa police station apan wala na mobalik.

Si Sr. Supt. Jesus Gaquing, director sa kapulisan sa lalawigan sa Sugbu nimandu na kagahapong adlawa nga parelibuhan si Chief Insp. Januario Sario, hepe sa Ronda Police Station ug ang jailer nga si PO1 Rubia.

Miduso usab si Gaquing og suwat ngadto kang Mayor Esteban Sia sa Ronda ug mi-rekomendar og lima ka mga pangalan sa mga opisyal nga pilian aron ihulip kang Chief Insp. Sario. (Darrel Carumba ug Guam Logroño)   (BANATNEWS)