CEBU, Philippines - Nadakpan sa kapulisan ang usa sa duha ka mga suspek sa pagpamusil patay sa retiradong polis nga bodyguard ni Carmen Mayor Sonia Pua diha sa panimalay niini sa lungsod sa Consolacion kagahapon sa buntag.
Ang nadakpan sa kapulisan sa Sta. Lucia Realty sa barangay Lamac lungsod sa Consolacion alas 9:00 kagahapon sa buntag mao si Jonathan Capuyan Salva, 46, molupyo sa Cabungajan siyudad sa Danao ug usa ka construction worker.
Matud ni SPO1 Danilo Laurente sa Carmen Police dihang nahinabi sa Banat News nga ang suspek gidakop sa grupo pinangulohan sa ilang hepe nga si Insp. Carlos Reyes Jr. subay sa warrant of arrest sa kasong kalapasan sa RA 6425 kon illegal drugs nga giluwatan sa sala ni Danao City RTC Judge Edito Enimesio. Matud pang Sr. Supt. Jesus Gaquing, director sa Cebu Provincial Police Office nga dunay nakatumbok kang Salva nga apil sa unom ka tawong mipatay sa bodyguard ni Pua nga si Nonito Taoy niadtong Nobiyembre 9 ning tuiga diha sa gawas nga bahin sa trabahoan niini sa M-1 Security Agency sa barangay Cogon West sa lungsod sa Carmen.
Matud pa ni SPO1 Laurente niadtong Lunes pa sa gabii migikan ang iyang mga kaubanan pinanguloahan sa ilang hepe paingon sa lungsod sa Consolacion human makadawat og impormasyon sa presensya sa suspek nga atua magtrabaho sa usa sa mga balay sa Sta. Lucia isip mason.
Apan si Salva nga kasamtangan nang gibalhog sa detention cell sa kapulisan sa Carmen hugtanong mihimakak sa tanang mga alegasyon batok kaniya. (BANATNEWS)