CEBU, Philippines - Samdan ang bukobuko sa usa ka drayber sa habal-habal dihang giunay kini pagpusil sa iyang pasahero didto sa barangay Nangka, lungsod sa Consolacion sa milabay’ng gabii.
Ang biktima mao si Rex Tarona, 24, ulitawo , nga taga barangay Tugbungan sa mao gihapong lungsod ug usa ka drayber sa habal-habal samtang ang suspetsado nailhan lang nga usa ka "Dodoy" kinsa anak sa usa ka tanod sa barangay Nangka.
Matud pa ni PO1 Jovanie Mabano sa Consolacion Police Station nga sayo niini, gipara ni Dodoy si Tarona ug samtang nag-angkas kini sa likod sa biktima, nagkalalis ang duha.
Si Dodoy nga nahutdan na og katarungan milanit sa armas de fuego niini ug gidaitol sa pagpabuto sa buko-buko sa biktima.Gumikan sa samad pinusilan sa likod, gihatod dayon ang biktima ngadto sa Vicente Sotto Memorial Medical Center, samtang ang suspetsado dali kaayong nakasibat nga mao karon ang gipangita sa mga kapolisan sa Mandaue. – BANAT NEWS