Ulo sa babaye napisat sa trak

CEBU, Philippines - Pabiling wala pa mailhi sa kapulisan ang usa ka ginang nga nadugmok ang ulo sa karsada human kini maligsi sa Isuzu Elf nga trak atol sa iyang paglabang sa karsada sa sitio Tabok barangay Maslog siyudad sa Danao kagahapon sa alas 4:20 sa kaadlawon.

Si PO1 Rommel Costan, traffic investigator sa Danao City Police mibutyag dihang nahinabi sa Banat News nga ang biktima gihulagway nga nagpangidaron og 30 ngadto sa 35 anyos, nagsul-ob og short nga kolor puti ug sininang puti, 4'11 ang gitas-on ug naka-tsinelas nga dunay dala nga bag nga dunay mga sulod nga unlan, sabon, alcohol, shampoo ug uban pa.

Samtang ang drayber sa trak nga nagdala sa plaka nga GLH-321 mao si Servando Alinabon Marzon, 46, taga Umapad siyudad sa Mandaue malinawong mitahan sa kaugalingon diha sa kapolisan human sa hitabo.

Matud ni PO1 Costan gikan sa Mandaue ang maong trak paingon sa lungsod sa Tabogon aron sa pagpangompra og mga baboy apan pag-abot sa maong lugar kalit nga milabang ang biktima ug wala mabantayi sa drayber hinungdan nga kini nadasmagan.

Sumala pa ni PO1 Costan ang mga nakasaksi mitug-an nga nalabay gyud og sobra upat ka metros ang biktima ug pagtugpa nag-una ang ulo niining nabunal sa semento nga karsada ug maayong pagkabuak niini.

Nakadawat og impormasyon ang kapulisan nga dunay deperensya sa pangisip ang biktima ug kanunay kining makit-an sa maong lugar nga magsuroyan.

Ang kapulisan sa Danao nanawagan sa mga kabanay nga nawad-an og paryente pagsusi sa maong patay'ng lawas nga gihaya sa punerarya sa maong siyudad pamasin og mao kini ang ilang kadugo.

Samtang ang drayber boluntaryong nitahan sa iyang kaugalingon ug nagtingkagol na karun sa detention cell samtang nagpaabot sa tukmang sumbong nga ipasaka. (BANATNEWS)