CEBU, Philippines - Mitiyabaw ang kapitan sa barangay Canjulao sa dakbayan sa Lapulapu human kini kuhai sa tanang panginahanglanon niini sa ilang barangay sumala pa sa reklamo ni barangay kapitan Rufo Bering.
Si Bering sa pakighinabi sa Banat News mibutyag nga sukad mibiya siya sa poder sa administrasyon ni Lapulapu City Mayor Arturo Radaza iya nang nabatyagan nga gihinayhinayan og kuha sa mayor ang tanang tabang gikan sa dakbayan diha sa iyang barangay.
Kini sama sa multicab nga gikuha niadtong Enero 27 ning tuiga hinungdan nga wala na sila’y magamit sa mga opisyal nga lakaw ug emergency, gibakwi usab ang P7.8 milyones nga gahin alang unta sa ilang covered court sa barangay ug gihatag ngadto sa laing barangay.
Bisan naaprobahan na sa konseho sa barangay ang ilang budget sa tuig 2009 balor P3.6 milyones apan hangtud karon wala pa kini mahatag ngadto kanila, lakip sa giingong gibakwi mao ang kalibre .9mm pistol nga gi-issue ngadto kaniya ug ang mga tinguhang pagpa-recall kaniya sa iyang katungdanan.
Dugang sa gihulgway nga pangdaog-daog kaniya ug sa iyang banay mao ang pagpabalhin sa iyang igsuon ngadto sa Isla sa Olango, pagtangtang sa iyang mga job order employees ug ang pagpasuspenso kaniya sa Ombudsman sulod sa duha ka bulan.
Si ABC president ug Pajo barangay kapitan Leo Mercado, ang tigpamaba ni Radaza nagkanayon nga dili kalikayan nga si Bering kuhaan sa mayor sa iyang mga mihuras gumikan kay nawad-an na kini og salig ngadto sa kapitan human kini misukol ngadto sa administrasyon ni Radaza.
Usa sa gibasehan ni Mercado mao ang kanunay nga pagdaot ni Bering diha sa tulomanon niini sa radio ngadto sa mayor nga walay basehanan ug ang daan nang batasang mosukol si Bering sa kanhing mga administrasyon.
Gibutyag ni Mercado nga sa panahon ni kanhi Mayor Max Patalinjug si Bering nagdala og lungon isip pagsupak sa administrasyon ni Patalinjug, misupak usab kini sa administrasyon kaniadto ni Mayor Ernest “Jun” Weigle gumikan kay wala matuman ang posisyon nga gipangayo niini sa mayor.
Giangkon hinuon ni Bering ang pagkasupakero niini sa mga nangaging administrasyon apan igo lamang siyang misupak sa gihulagway niyang mga kurapsyong nahitabo ug gipanghimakak niya ang alegasyon nga duna siya’y mga personal nga interest sa iyang pagkaaktibista kaniadto. - BANAT NEWS