CEBU, Philippines - Gibana-banang mokabat sa P4 milyon ang kantidad sa 4 mil ka mga punoan sa Marijuana ang nalarot gikan sa sitio Busay, barangay Patong lungsud sa Badian niadtong Biyernes sa kaadlawon.
Ang maong pagpanglarot sa marijuana gipanguluhan mismo ni Police Insp. Ricky Neron sa Criminal Investigation and Detection Group (CIDG-7) ug Supt. Rey Lyndon Lawas sa Regional Mobile Group-7 inabagan sa mga sakop sa Philippine Drugs Enforcement Agency (PDEA-7).
Ang lokasyon sa maong plantasyon gilakaw pa og pipila ka mga oras sa mga operatiba nga anha giagi sa kabukiran sa Mantalongon lungsud sa Dalaguete.
Dihang naabot ang grupo sa dapit dunay unom ka mga site sa plantation sa Marijuana nga ilang naabtan sa mga kasikbit nga bukid nga anihunon na niadtong higayuna hinungdan nga ila gilayong gipanglarot.
Apan napakyas ang maong grupo sa pagsikop sa mga responsableng tawo o farmers nga nananom niini gumikan sa kalayo sa maong lugar ug walay mga panimalay.
Hinuon ni-kooperar na sila karon sa mga lider sa nahisgutang lugar aron sa pamasin nga ilang mailhan ang mga tawong nagtanom niini.
Ang ubang mga marijuana nga naibot ang gipangdauban nalang nila didto sa lugar ug adunay pipila nalang niini ang gidala sa ilang buhatan alang na sa pagpa-ubos niini sa laboratory.( Guam Logroño) (BANAT NEWS)